Öfl í þjóðfélaginu vilja nú vængstýfa forsetaembættið með því að afnema vald forseta til að skjóta umdeildum málum til þjóðarinnar.
Stjórnarskráin okkar er frá upphafsdögum lýðveldisins árið 1944. Hún var samin af þeim sem þá sátu á þingi.
Ég hef grúskað í Alþingistíðindum til að kanna hvað höfundar stjórnarskrárinnar hefðu einmitt sagt um málskotsréttarákvæðið. Það skiptir nefnilega grundvallar máli að vita hvaða hugsun lá að baki því að það var sett inn í stjórnarskrána. Ég vélritaði þetta upp og bjó til birtingar á netinu.
Hér fyrir neðan er það sem ég hef fundið í umræðunum og ég tel að varði þann málatilbúnað sem varðar málskotsréttinn. Vilji fólk kanna betur samhengi þeirra tilvitnana sem hér fylgja á eftir, þá er hægt að fletta upp í Alþingistíðindum.
Þegar lesið er gegnum ræður höfunda stjórnarskrár lýðveldisins, þá verður manni fljótlega ljóst að hér voru engir aukvisar á ferð. Þarna var Alþingi mannað alvöru þingmönnum. Með því að smella á nöfn þeirra flestra hér fyrir neðan má komast í æviágrip þeirra á vef Alþingis og glöggva sig þannig betur á því hverjir voru hér á ferð.
Feður lýðveldisins Íslands og höfundar stjórnarskrárinnar, voru snjallir og hugsandi menn. Þeir vissu hvað þeir voru að gera og gerðu sér grein fyrir þeirri ábyrgð sem lá á herðum þeirra með tilliti til framtíðar og komandi kynslóða.
Umræðurnar um stjórnarskrána, valdsvið forseta lýðveldisins, málskotsréttinn og vald Alþingis og þjóðar sem hér fara á eftir, áttu sér stað síðla veturs árið 1944.
Sjálfstæð og fullvalda þjóð var að fæðast.
